Après moi, le déluge

Sa bawat paghitit, ibayong ligaya ang nakakamit
Parang ayokong ibuga, nais kulungin sa aking dibdib
Lunas ka sa bawat minutong walang kasiguraduhan
Dahil sa yo lahat ng pagdurusa'y nalilimutan.



Milyong tinig ang nagsasabing
Ika'y isang traydor sa kumakatok sa dilim
Papatayin ang katawan ng dahan-dahan
Walang siglang ititira
Kikit'lin ang iyong tanglaw at pag-asa

Tulad ng iyong puting usok
Kapayapaan ko'y naaarok
Walang sawa kang aasamin
Sa init mo gumagaan ang aking damdamin.

Sa aking pag-iisa
Ikaw lamang ang lagi kong kasama
Daig mo pa ang isang payaso
Pilit ngumingiti kahit hindi totoo.


Ikaw ang buhay at kamatayan ko
Ang umpisa at wakas ng pagkaliyo
Walang pagsisising ika'y aking kakanlungin
Kung sa bawat upos mo'y tagumpay ang ililibing.

Misteryo ka sa tayog mong taglay
Sa iyong mga abo nais kong humimlay
Walang pagdadalawang isip kong tatanggapin
Na ako'y isang manhid na alipin.

Iiwanan kita
Nang isang librang lungkot
At isang gusing saya
Dahil sa araw ng aking pagpanaw
Di ko na pakikialaman ang bawat mong galaw.